Yadda zaki tsare kanki daga sharrin miyagun samari

YADDA ZAKI TSARE KANKI DAGA SHARRIN MIYAGUN SAMARI :
TAMBAYA TA 2242
*******************
Assalamu alaikumun
Allah ya taimaki Malam, yasa ka cika dakyau da imani tare da sauran al'umman Muslimai (amin)
Malam shawara nake nema da addu'a. Na kasance a duk lokacin da nayi Saurayi bai da buri illah ya nema ya taba ni ko son yayi lalata dani, kuma basu maganar aure, sai da-daya daga cikin su. Hakan na mutakar damuna, Kasancewa ni macece da bana bayyana ado na, ina kuma kokarin gani na kare mutuncin kaina.
Daga Dalibarka mai bin Shafin Zauren fiqhu.
AMSA
*******
Wa alaikis salam wa rahmatullahi wa barakatuhu.
Hakika kowanne mutum Mumini akwai irin musibar da Allah yake jarrabarsa da ita domin ta zama jarrabawa ga imaninsa.
Ki dauki irin wannan abinda ke faruwa dake din amatsayin jarrabawa ne daga Allah. Kuma hanyar cin jarrabawar ita ce :
- Jin tsoron Allah fiye da komai.
- Dukufa wajen yin addu'ar neman kariya daga Allah bisa rayuwarki baki daya.
- Kiyaye Mutuncin kanki da Iyayenki da danginki.
- Kokarin rabuwa da saurayi da zarar kin gane manufarsa.
- Kiyi kokari ki fidda saurayi guda Mai alamar tsoron Allah da riko da addini.
- Bayan kin tsaida saurayi guda to karki sake amincewa da kowa.
- Kada ki yarda ki kadaita da saurayi koda kuwa ya kai miki sadaki. Wajibi ne ki nemi wata Qawarki, ko Qanwarki ko wani Qaninki mai wayo ya kasance tare daku.
- Duk hirar da zakuyi kar ku wuce kofar gidanku. Kar ki yarda kije dakin saurayi.
- Duk saurayin da zai zo wajenki, to ki gaya masa yazo miki da rana. Ki dena hira dasu da dare.
Kada ki bama saurayi damar ta'ba jikinki koda ya biya sadakinki ai ba'a daura aurenku ba tukunna. Don haka baki halatta gareshi ba.
Komai kyawun saurayi komai kudinsa, kada kici gaba da alaqah dashi mutukar kin fahimci cewa yazo da Mummunar mafuka.
Idan kika rabu dashi domin Allah, to Allah din zai hadaki da wani wanda yafishi alkhairi in sha Allah.
Allah yana cewa :
"DUK WANDA YAJI TSORON ALLAH, TO ALLAH DIN ZAI SANYA MASA MAFITA. KUMA ZAI AZURTASHI TA INDA BA YA TSAMMANI... ".
Allah yace :
"LALLAI ZA'A JARRABEKU ACIKIN DUKIYOYINKU DA KUMA KAYUWANKU..".
Kuma Allah yace :
"KADA KUBIBBIYI HANYAR SHAITAN. HAKIKA SHI MAKIYINKU NE MAI BAYYANAR DA QIYAYYA.
"KA'DAI SHI YANA UMURTARKU NE DA MIYAGUN AYYUKA DA ALFASHA...".
Mazinatan Samari Wakilan shaitan ne. Kuma suna kiranki ne zuwa ga alfasha da kuma Wutar Jahannama. Don haka Kiji tsoron Allah kada garin jin dadin Minti biyar ki janyo ma kanki Azabar sama da shekaru dubu biyar. (Allah shi kiyayemu).
WALLAHU A'ALAM.
DAGA ZAUREN FIQHU