Duniya makaranta !! (fitowa ta 23) dr.mansur ibrahim sokoto

DUNIYA MAKARANTA

Fitowa ta 23

111. Alamun mai riya guda uku ne: A fili yana sallah, a boye yana wasa. Idan an gan shi an ga mumini, idan ya kebanta ya koma fasiki. Bakinsa ya fi zuciyarsa karfi. Allah ka kare mu daga sharrin riya.

112. Abu uku ba a wasa da su: Addininka, da kasarka, da mutucinka. Abu uku ba a fadar su: Arzikinka da Iliminka da yawan shekarunka.

113. Ba kowace magana ce ake ba da amsar ta ba. Ko shiru magana ce.

114. Sana'arka arzikinka. Annabbi Dawuda makeri ne. Annabi Zakariyya kafinta ne. Annabi Idris madaunki ne. Annabinmu makiyayi ne. Nemi na kanka. Zaman banza babbar cuta ce. Arziki kuma zomo ne. Zomo ba ya kumuwa da kwance!

115. Yi murmushi idan ka ga mai son ka, zai ji dadi. Yi murmushi idan ka ga mai kin ka, zai ji tsoro. Yi murmushi idan ka ga wanda ya bar ka, zai yi da-na-sani. Yi murmushi ga wanda ka sani da wanda ba ka sani ba. Murmushi kwararjini ne ga namiji, ado ne ga fuskar macce.

Rubutawa: Dr. Muhammad Mansur Ibrahim Sokoto

28/10/1438
22/7/2017

» Gabatarwa Zauren Minbarin Malamai +2347037477743