Fitowa ta 27
131. Zunubin da ya sa ka yin da-na-sani da komawa ga Allah ya fi ibadar da ta sa ka girman kai da dagawa!
132. Sarakunan da suka yi mulkin duniya duk sun tafi ba su san dadin duniya ba. Ba wutar lantarki, ba ruwan Firijin, balle kuma Fanka da AC. Ba su hau keke ko Mashin ba, ballantana motoci da jirge. Ba su san abin ake kira Tarho ba ballantana wayar tafi-da-gidanka. Duk hasken gidajensu a wancan lokaci bai wuce na Kyandurda Fitila mai amfani da kalanzir ba. A yau kai Sarki ne amma ba ka gamsu da abin da ka samu ba. Idan kana da mota ta makwaucinka kake kallo. Idan kana da gida na wani ka ba ka sha'awa. Oh! Allah Sarki. Dan adam da guri yake mutuwa.
133. Idan ka kas gane wurin da ka yi shuka kada ka samu damuwa. Watarana ruwan sama ne zai nuna ma ka. Haka rayuwa take. Yau da gobe babbar makaranta.
134. Hattara da hawaye guda uku:
a. Hawayen iyaye da
b. Hawayen maraya da
c. Hawayen wanda ka zalunta.
Kowanen su hawayensa na iya nutsar da kai a cikin tekun bala'i.
135. Mala'iku suna da hankali ba su da sha'awa. Dabbobi suna da sha'awa ba su da da hankali. Dan adam ne Allah ya hada ma sa guda biyun. Idan hankalinka ya rinjayi sha'awarka ka bi sawun Mala'iku. Idan sha'awarka ta zarce hankalinka ka shiga sahun dabbobi.
Rubutawa: Dr. Muhammad Mansur Ibrahim Sokoto
1/11/1438
25/7/2017
» Gabatarwa Zauren Minbarin Malamai +2347037477743
0 comments:
Post a Comment