Fitowa ta 28
136. Karatu akwai wuya, ilimi akwai dadi. Nema akwai wuya, arziki akwai dadi. Zama da jahilci ba wuya, rashin ilimi akwai takaici. Haka duniya take, yaro bata hankalin dare ka yi suna!
137. Allah ya ya mana kunnuwa biyu da idanu biyu amma ya yi mana baki guda daya saboda ya fi son mu yi kallo, mu yi saurare fiye da yadda mu ke magana
138. Idan na kwarai da mugu suka hadu kowa ma yana iya gane banbamci. Amma a tsakanin na kwarai da wanda ya fi shi, da mugu da wanda ya fi, wannan sai masu hankali ke iya rarrabewa.
139. Ba a sanin matsayin saurayi sai ya yi aure. Ba a sanin halin talaka sai ya wadata. Ba a sanin gaskiyar dan Siyasa sai ya kai ga mukami.
140. Ba kowane wayayye ne mai ilimi ba. Ba kuma kowane mai ilimi ne yake da wayewa ba. Idan Allah ya ba ka ilimi nemi sanin duniya da zamanin da kake cikin sa, sai ya zama kana daa haske a kan haske. Idan kuma kana da wayewa da sanin duniya matsa kusa da malamai ka kara sani, sannan ne wayewarka za ta amfane ka.
Rubutawa: Dr. Muhammad Mansur Ibrahim Sokoto
2/11/1438
26/7/2017
» Gabatarwa Zauren Minbarin Malamai +2347037477743
0 comments:
Post a Comment